Эрүүл мэндийн яамнаас мэдээлэл хийж байна.
Мэдээллийн эхэнд тавдугаар сард 11-11 төвд ирсэн эрүүл мэндийн салбартай холбоотой өргөдөл гомдлын шийдвэрлэлтийг танилцууллаа.
Иргэдээс хамгийн их ирсэн санал хүсэлтийн тухайд:
- Өндөр настай иргэдийг эмнэлэгт дараалалгүй үйлчлүүлэх боломжоор хангах
- Хавдартай хүмүүст химийн эмчилгээг тухайн орон нутагт нь хийлгэдэг болгож өгөх
- Эмнэлэгт цаг авах асуудлыг хялбарчилж, иргэдэд хүртээмжтэй болгож өгөх
- Хүүхдийн эрт илрүүлгийн багцад шинжилгээнүүдийг нэмж өгөх
- Эрт илрүүлэг зохион байгуулалтгүй байгаа учир анхаарч өгөхийг тус тус хүссэн байна.
Энэ үеэр ЭХЭМҮТ-ийн Эмчилгээ эрхэлсэн дэд захирал Т.Болормаа хүүхдийн томуугийн өвчлөлийн талаар мэдээлэл өгөв.
Тэрбээр “ЭХЭМҮТ-ийн хүүхдийн тасаг сүүлийн гурван сар ачаалал их байгаа. Гэхдээ 1,2-р сартай харьцуулахад үндсэн ачаалал 25 хувиар буурсан үзүүлэлттэй байна. ЭХЭМҮТ-ийн хүүхдийн зөвлөх полклиникээр долоо хоногт 5000 гаруй хүүхэд, яаралтай тусламжийн тасгаар 1600-1800 хүүхэд үйлчлүүлж байна.
Сүүлийн 7 хоногт томуугийн А хүрээний Н3N2, SARSCOV-2 болон бусад томуу төст өвчний вирусууд орчинд их гэсэн мэдээ байна. Тиймээс хүүхдүүдийн дунд өндөр халуурах шинж тэмдгээр илэрч байгаа томуу, томуу төст өвчин хоёр жилийн өмнөх ковидын үетэй харьцуулахад буурахгүй, үргэлжилж байна.
Магадгүй ковидын дэглэм буурсантай холбоотойгоор ард иргэд тайвширч, олон нийтийн газраар хүүхдээ дагуулж явах, халдвар хамгааллын дэглэмээ баримтлахгүй байгаа зэргээс үүдэж томуугийн дэгдэлт үргэлжилж байж болзошгүй гэж үзэж байгаа” гэв.
