Нийгмийн бодлогын байнгын хорооны өчигдрийн хуралдаанаар Улсын Их Хурлын гишүүн Н.Учрал нарын 22 гишүүн 2022 оны 5 дугаар сарын 03-ны өдөр өргөн мэдүүлсэн “Хянан шалгах түр хороо байгуулах тухай” Улсын Их Хурлын тогтоолын төсөлийг хэлэлцэв.
Энэ үеэр УИХ-ын гишүүн П.Анужин “Хянан шалгах түр хороо маш чухал ач холбогдолтой тул байгуулахыг дэмжиж байна. Эмийн чанарын талаар ярьж, дуугарсаар ирсэн. Ингэх болгонд нийгмийн зүгээс асар их дайралттай тулгарч, элдэв гүтгэлэгт өртдөг. Энэ бол эм бизнесжээд, мафижсаныг илэрхийлж байгаа юм. Яагаад монгол хүн өөртөө хэрэглэх эрүүл мэндийн нэмэлт бүтээгдэхүүн буюу биологийн идэвхит бүтээгдэхүүнийг хилээр оруулж ирж болохоо больсон юм бэ? Үүний цаана бүгдийг нь хянах бүлэглэл бий болчихсон л гэсэн үг.
Бизнес л хийх сонирхолтой. Нярай, төрөлхийн саажилттай, эмгэгтэй хүүхдүүдийн уналт, таталтын асуудлыг анхаармаар байна. 60-70 сая төгрөг төлж, зөвхөн таталтыг болиулах эмийг солиулахаар Энэтхэг улс руу явж байна. Эмнүүлэх гэж биш. Ийм эмгэнэл байж болох юм уу. Монголд хэрэглэж байгаа эм нь нөлөөлөхөө больсон учраас нь 60-70 саяар эмийг нь солиход хүүхэд долоо хоногийн дотор таталт өгөхөө больчихож байна. Бид нар өнөөдөр ямар эм хэрэглээд байна вэ. Ямар гарал үүсэлтэй, хаана үйлдвэрлэгдсэн, ямар зорилготой эм хэрэглээд байна вэ гэдэг Үндэсний аюулгүй байдлын асуудал мөнөөс мөн” гэлээ.
