УИХ-ын Хууль зүйн байнгын хорооны хуралдаанаар Зөрчлийн тухай хуульд нэмэлт, өөрчлөлт оруулах хуулийн төслийн хэлэлцэх эсэхийг хэлэлцэж байна. Хэлэлцэж байгаа асуудалтай холбоотойгоор гишүүд асуулт асууж, хариулт авлаа.
Шадарсайд С.Амарсайхан “Статистик тоо баримтаас харахад нийт зөрчлийн 95 хувь нь замын хөдөлгөөний дүрэм журам, аюулгүй байдал зөрчсөн байна. Цаашид Зөрчлийн тухай хуулиа ямар хэмжээнд үйлчлэх вэ гэдгийг зарчмын хувьд тодорхой болгох ёстой. Одоо энэ хууль зөвхөн замын хөдөлгөөнд зориулсан л хууль болчихоод байна.
Энэ Зөрчлийн хуулиар 10 удаа торгуулчихаад, 2-3 удаа согтгуугаар жолоо барьчихаад, өнөөдрийг хүртэл замын хөдөлгөөнд оролцож байгаа асар олон иргэн байна. Хувь хүний нэр хүнд, нууцтай холбоотой учраас нэр устай нь хэлэх боломж алга.
2020 оны байдлаар Зөрчлийн тухай хуулиар торгуульсан ч торгуулиа төлөөгүй 2 сая гаруй зөрчил байсан. Хэрэгтэй зүйл дээрээ энэ хуулийг хэрэгжүүлж чаддаггүй. Энэ хууль зөвхөн иргэн, цагдаа хоёрын зөрчлийн хууль болчихоод хооронд нь алалцуулаад байна” гэлээ.
