Өчигдөр OCCRP (Organized Crime and Corruption Reporting Project) төслийн вэб сайтад дэлхийн томоохон оффшор бүсүүдийн нэг Люксембург улсад бүртгэлтэй компаниудын насанд хүрээгүй эзэмшигчдийн талаар танилцуулсан. Үүнд дурьдсанаар Монголын говьд үйл ажиллагаа явуулдаг томоохон нүүрс олборлогч компанийн эзэн нь нэг настай монгол хүүхэд байжээ.
АТГ-т энэ талаарх мэдээлэл байгаа эсэхэд тус газрын Хэвлэл мэдээлэл, олон нийттэй харилцах ажилтан, комиссар Н.Тэмүүлэн дараах мэдээллийг өглөө.
Тэрбээр, “Өчигдөр гарсан Люксембургтай холбоотой мэдээлэл мэдээж оффшор бүсэд хамаарна. Нэг настай хүүхэд хуулийн этгээдтэй байна гэдэг бол үүний цаана улс төрд нөлөө бүхий этгээд, албан тушаалтан байгаа гэж сэжиглэх нэг үндэслэл болно. Үндэслэлгүйгээр хөрөнгөжсөн байж болзошгүй гэдэг утгаар холбогдох хэлтэст нь материал шилжүүлдэг. Энэ талаар нарийн мэдээлэл өгөх боломжгүй байна. Энэ хэргийг нарийн шалгаж байгаа эсэхийг тодруулаад хариу мэдэгдье” гэлээ.
