Улсын Их Хурлын Эдийн засгийн байнгын хорооны өчигдрийн хуралдаанаар “Зээлийн хүүг бууруулах стратеги батлах тухай” Улсын Их Хурлын тогтоолын хэрэгжилтийн талаар мэдээлэл сонслоо. Энэ үеэр “Зээлийн хүүг бууруулах стратеги батлах тухай” тогтоолын хэрэгжилтийг Монголбанкны ерөнхийлөгч Б.Лхагвасүрэн танилцууллаа.
Тэрбээр, “Зээлийн дундаж хүү 14,5 хувь байна. Хөтөлбөрийн зээл буюу ипотекийн зээл зэргийг оруулах юм бол 13,8 байна. 2020 оны наймдугаар сард стратеги баталж байхад цалин барьцаалсан зээлийн дундаж хүү 17,65 байсан бол өнөөдрийн байдлаар 14,53 байна. Бараг 3 нэгжээр буурсан байна. Автомашины лизингийн зээл 19,45 байсан бол 16,50 болсон. Зээлийн дундаж хүү ерөнхийдөө буураад явж байна. Стратеги хэрэгжүүлэх төлөвлөгөөний дагуу 2023 оны эцэст сарын 1 хувь буюу жилийн 12 хувьд хүрэх зорилт бий. Энэ бол дундаж хүү. Хэрвээ Засгийн газраас хэрэгжүүлж байгаа бусад хөтөлбөрийн зээлийн хүүг үүнд оруулж тооцвол дундаж хүү 13.8 хувь буюу сарын 1.15 хувьд хүрч буурсан” гэв.