Казахстан Улсын Засгийн газар 2022 оны нэгдүгээр сарын 1-ний өдрөөс эхлэн шингэрүүлсэн хийн үнийг нэмэгдүүлэх шийдвэр гаргасантай холбогдуулан эсэргүүцлийн жагсаал Мангистау мужийн Жанаозен болон Актау хотуудад энэ сарын 2-ны өдөр гарч, Алматы, Нур-Султан зэрэг хотуудад тэлсэн.
Хийн түлшний үнэ 60-120 тенге (393-аас 786 төгрөг) болж нэмэгдсэнийг эсэргүүцсэн жагсаал хяналтаас гарч, нийтийг хамарсан эмх замбараагүй байдал болж хувирсны улмаас тус улсын Ерөнхийлөгч Касым-Жомарт Токаев 14 хоногийн Онц байдал зарлаж, Казахстаны дотоодын цэрэг олон нийтийн газруудад хяналт тогтоогоод байгаа юм.
Алматы, Нурсултан хотод тээврийн хэрэгслийн хөдөлгөөг хязгаарлах, иргэний үнэмлэхийг баталгаажуулах, биечлэн шалгах, эд зүйл, тээврийн хэрэгслийг шалгах, хувь хүн, хуулийн этгээдээс зэвсэг, сум, хорт бодисыг түр хураан авах, зэвсэг, сум, хорт бодис, цэргийн болон сургалтын техник, тэсэрч дэлбэрэх бодис, цацраг идэвхт бодисыг түр хураах зэрэг арга хэмжээг авч буй.
Ерөнхийлөгч К.Токаев ард түмэндээ хандаж “Төрийн тэргүүний хувьд, мөн өнөөдрөөс Аюулгүй байдлын зөвлөлийн даргын хувьд ард иргэдийн энх амгалан, аюулгүй байдлыг хамгаалахын төлөө бүхий л арга хэмжээг авна” гэж мэдэгджээ.
Ерөнхийлөгч Токаев нөхцөл байдалтай холбогдуулан Хамтын аюулгүй байдлын гэрээний байгууллагаас (ХАБГБ) тусламж хүссэн талаар мэдээлэл гарсан. Улмаар Хамтын аюулгүй байдлын тухай гэрээний байгууллагын (ХАБГБ) орнуудын Хамтын аюулгүй байдлын зөвлөл Казахстаны нөхцөл байдалтай холбогдуулан тус улсад энхийг сахиулах хүчин илгээхээр шийдвэрлэсэн тухай мэдээлэл цацагдаад байгаа юм.
Тус улсад үүссэн нөхцөл байдалтай холбоотойгоор Монгол Улсаас Бүгд найрамдах Казаxстан улсад суугаа Элчин сайдын яамнаас иргэдийг олон нийтийг хамарсан аливаа жагсаал цуглаанд оролцохгүй байх, өөрийн болон ойр дотны хүмүүсийн аюулгүй байдалд анхаарч, олон нийтийн газар болгоомжтой зорчихыг зөвлөсөн.
Гадаад харилцааны яамны мэдээлснээр өнөөдрийн байдлаар манай улсын нийт 4,028 иргэн Казахстанд ажиллаж, амьдарч байна. Үүнээс 1,383 хүн хууль ёсны дагуу, 1,600 хүн хууль бусаар оршин сууж байгаа бөгөөд нийт 1,045 оюутан сурч байна. Түүнчлэн давхар иргэншилтэй байж болзошгүй 500 гаруй хүн байгаа аж.
Бүгд Найрамдах Казахстан Улсад үүсээд буй нийгмийн эмх замбараагүй байдлын улмаас тус улсад байгаа монгол иргэдийн эрүүл мэнд, бие махбодид хохирол учирсан тохиолдол одоогоор гараагүй, Консулын газрын шуурхай утсанд холбогдсон тохиолдол одоогоор байхгүй байна.
Үүсээд байгаа нөхцөл байдалтай холбоотой яаралтай туслалцаа, зөвлөгөө авах бол Нур Султан дахь ЭСЯ-ны +77172266773,+77055840628, +77051395535 болон Консулын газрын 83042222 дугаарын шуурхай утсаар холбогдох боломжтой юм.