Чуулганы хуралдаанаар хэлэлцэх асуудалтай холбогдуулан УИХ-ын гишүүн Б.Пүрэвдорж үг хэллээ.
Тэрбээр “Миний бие тэтгэврийг долоон жилээр биш таван жилийн дунджаар тогтоох, мөн 2018 оноос хойш долоон жилийн дунджаар тэтгэврээ тогтоолгосон хүмүүсийг таван жилээр нөхөж тооцох тухай хуулийн төслийг өргөн барьсан.
Нэлээд тэмцэж байж арваннэгдүгээр сард хэлэлцэх асуудлыг жагсаалтад оруулсан. Харамсалтай нь Нийгмийн бодлогын байнгын хороо уг хуулийн төслийг хэлэлцээгүй. НББХ-н дарга энэ хуулийг түүхий хууль гээд байгаа. Тийм биш. Түүхий болчихсон юм байхгүй. 30-40 жил татвараа шударгаар төлсөн иргэд тэтгэврээ таван жилийн дунджаар тооцуулж авдаг болох л тухай хуулийн төсөл юм.
МАН дандаа таван жилээр ажлаа төлөвлөдөг нам. Гэтэл ард түмэндээ тэтгэвэр олгох болохоор долоон жил болгочихлоо. Иргэд дордохын долоон жилээр тэтгэврээ тогтоолгоод эхлэхээр анхнаасаа бүтэлгүйтээд байна. Тиймээс энэ хуулийг яаралтай хэлэлцэх шаардлага байна. Бараа бүтээгдэхүүний үнэ 2018 оноос хойш 52 хувиар өсчихлөө. Барааны үнэ цалин орлого багатай, тэтгэврийн насныханд хамгийн хүндээр тусдаг. Цалин өндөртэй улсад 1200 төгрөгийн талх 1500 болох нь тийм ч асуудал биш. Энэ тооцоололд түүхий гээд байх юм байргүй.
Тэтгэврийг таван жилийн дунджаар тооцдог болсноор 140 мянга орчим иргэн сар бүр дунджаар 120 мянган төгрөг нэмж авахаар болж байгаа. Үүнд жилд 140 мянган иргэдэд 16 орчим тэрбум төгрөг шаардлагатай. Энэ бол Богд Зонхова бурхан барих төсвийн тал нь шүү дээ. Ийм хэмжээний төсвөөр 140 мянган хүний асуудлыг шийдэх боломж байна.
Энэ асуудлыг залуу гишүүд маань дэмжээсэй гэж хүсэж байна. Та нар ч гэсэн настай болно, ахмадуудынхаа замаар явна шүү. Тиймээс энэ хуулийг арванхоёрдугаар сард хэлэлцэх асуудлыг жагсаалтад нэмж оруулж өгөөч гэдэг хүсэлт гаргаж байна. 120 мянган төгрөг л нэмж очих юм. Ахмадууддаа цайны сүү ахиухан өгчихөөд аятай, тухтай амьдруулахад энэ хууль чиглэгдэж байгаа юм. Тиймээс 12-р сарын хэлэлцэх асуудалд үүнийг оруулж өгөхийг Их хурлын удирдлагаас хүсч байна. Энэ асуудал дээр санаачлагатай ажиллаач ээ” гэв.
