Өвлийн улиралд ямар амны хаалт зүүвэл тохиромжтой талаар НЭМҮТ-ийн ОЭМА-ны эрдэм шинжилгээний ажилтан А.Бүүвэйдулам мэдээлэл өглөө.
Тэрбээр “Өвлийн улиралд гадна орчинд амны хаалт зүүхэд цантаж тухгүй байдаг хэдий ч тохирсон амны хаалтаа тогтмол зүүх нь чухал юм. Учир нь амьсгалаар шүлс, шүлсэнцэрүүд цацарч байдаг. Тиймээс хичнээн гудамжинд задгай агаарт явж байгаа ч халдвар авах магадлалтай гэсэн үг. Халдвартай хүнтэй зөрөх, эсхүл урд алхаж байгаа хүн ханиаж, найтаах зэргээр эрсдэлтэй нөхцөл үүсэж болно. Үүнээс гадна өвлийн улиралд дан ганц нийслэлд гэлтгүй, аймгийн төвүүдэд ч агаарын бохирдол ихтэй. Агаарын бохирдлоос өөрийгөө хамгаалах ганц арга нь амьсгалж байгаа агаараа шүүх юм. Тиймээс PM2.5 тоосонцор шүүдэг амны хаалт зүүх шаардлагатай. Иймээс өвлийн улиралд N95 төрлийн амны хаалт хамгийн тохиромжтой юм” гэсэн юм.
