Уламжлалт анагаах ухаан ба Ковид-19 халдварын талаар УАУТХ эмнэлгийн Их эмч Б.Жаргалсайхан дараах мэдээллийг өглөө.
Тэрбээр, “Ковид-19-ийг Уламжлалт анагаах ухаанд халуун хижиг өвчний ангилалд багтаан авч үздэг. Хэвтэн эмчлүүлж буй иргэдэд хоолойн талхан эм, дархлаа дэмжих тангууд, цус цэвэрлэх тан, элэг хамгаалах болон шинж тэмдгийн тан, талх, үрлэн эм зэрэг уламжлалт анагаах ухааны эмийн эмчилгээг хийж байна. Ковид 19 халдвар авсан хүмүүст нойргүйдэх, зүрх дэлсэх, ханиалгах зэрэг шинжүүд ээлжлэн илэрч байгаа бөгөөд удаан хугацаанд арилахгүй байх тохиолдлууд их байна. Уламжлалт анагаах ухааны үүднээс зүрх дэлсэх үед “сорогзонноров”, “задь-5”, ханиалгах үед “жуган-25”, “лоцодгүнсэл”, нойргүйдэх үед “Лүн агар-8” зэргийг эмийн эмчилгээнд хавсран хэрэглэж байна.
Уламжлалт анагаах ухаанд тан эм гэж бий. Ковидын эсрэг нийтээрээ түлхүү хэрэглэж буй Норов-7, Мана-4 тангуудыг буцалгаж, идээшүүлж хэрэглэнэ. 7-10 минут буцалгахад хэрэгтэй бодисууд тунаж үлдэнэ.
Талхан хэлбэрийн эм гэж бий. Энэ нь нарийн нунтаг учир буцалгах шаардлагагүй, уух шингэндээ найруулж ууж болно. Хуурайгаар ам руу хийгээд араас нь усаар даруулж ууж болохгүй.
Үрлэн тан эмийг залгиж уух ба тодорхой хугацааны дараа задарч биед үйлчилгээгээ үзүүлж эхэлдэг.
Урт хугацааны ковидын үед уламжлалт анагаах ухааны эмчилгээ тохиромжтой. Халдварын дараах өвчний хор, эмийн хор, зовуурийг арилгахад анагаахын нэршлээр “Сүүлийг таслах” эмчилгээг хийдэг ба энэ нь тамирдсан биеийг чийрэгжүүлж, сэргээх үед ашигладаг уламжлалт эмчилгээ юм. Халдвар авсны дараа 10 хоног өнгөрсний дараа 7 хоног цус ялгах танг уулгаж байгаад 15, 16 дахь хоногоос хануур эмчилгээг хийж байна. Вирусын халдвар биед маш их хор ялгарууж, цус өтгөрүүлж байгаа. Өвчний хор, эмийн хорыг тайлах, цусыг цэвэрлэх, шингэлэх зорилгоор өвдсөнөөс хойших 17 дахь хоногоос хануур эмчилгээ хийлгэвэл илүү үр дүнтэй, эрхтэн системийн үйл ажиллагааг сэргээхэд илүү чиглэгдсэн эмчилгээ.
