Дэлхийн гепатиттай тэмцэх өдөр долдугаар сарын 28-нд тохионо. Монгол Улс тус өдрийг 2011 оноос эхлэн тэмдэглэн өнгөрүүлж ирсэн бөгөөд энэ жил дэлхий нийт “Гепатит… хүлээхгүй” уриатайгаар тэмдэглэх гэж байна.
Гепатиттай тэмцэх дэлхийн өдрийн хүрээнд ХӨСҮТ-ийн захирал Л.Баттөр мэдээлэл өгч, хэвлэлийнхний асуултанд хариуллаа.
Тэрбээр, “Монгол улсын хувьд элэгний В, С вирусын архаг халдвартай 400 орчим мянган хүн бий гэдэг тооцооллыг ДЭМБ-аас 2014 онд гаргасан. Үүний гол хүндрэл нь элэгний хатуурал, хавдар үүсгэх юм. Элэгний өвчлөлийн нас баралтаар манай улс дэлхийд тэргүүлж байгаа бөгөөд энэ нь дэлхийн дундажтай харьцуулахад 6 дахин их байна. Монгол улсын хэмжээнд элэгний хорт хавдрын 95 гаруй хувь нь гепатитын В,С вирусийн халдвараас үүдэлтэй нь судалгаагаар тогтоосон.
Аливаа халдварт өвчний хариу арга хэмжээнд гарсан нэг дэвшилт нь вакцинжуулалт. Гепатитын В вирусийн эсрэг вакциныг 1991 оноос заавал хийх дархлаажуулалтын товлолт нэвтрүүлсэн В вирусийн халдварын тархалтыг бууруулахад чухал ач холбогдол болсон. 2011 онд манай улс (0.58 хувь) тав хүртэлх насны хүүхдийн дунд гепатитын В вирусийн халдвар тээгчдийн тархалт буурч ДЭМБ Номхон далайн баруу бүсийн зорилтод хүрсэн. Мөн гепатитын А вирусийн эсрэг вакциныг 2012 оноос үе шаттай нэвтрүүлснээр А вируст гепатитын өвчлөл 10,000 хүн амд нэг тохиолдол болж, дархлаажуулалтын өмнөх үеэс 22 дахин буурсан” гэлээ.
Дэлхийн гепатиттай тэмцэх өдрийг тохиолдуулан android болон IOS үйлдлийн системд тохируулагдсан Know/HBV аппликейшнийг гаргажээ. Энэ нь В вирусын эмчилгээний үйл явцад өвчтөн өөрөө шийдвэр гаргахад тус дэм болох аж. Өөрөөр хэлбэл цөөн хэдэн лабораторийн үзүүлэлтийг оруулаад элэгний хатуурал байна уу, өөрчлөлт хэр явагдаж байна вэ гэдгийг мэдэх боломжтой. Энэхүү аппликейшн монгол хэл дээр байх бөгөөд зөвхөн иргэд гэлтгүй мэргэжлийн эмч нарт зориулсан удирдамж зэрэг бусад зүйлс бий.