Сурахад хамгийн хэцүү хэлнүүдийн тоонд хятад хэл багтдаг. Тиймдээ ч суралцагчаас илүү их хичээл зүтгэл шаарддаг. Хэрэгтэй мэдээлэл хүргэдэг “Хөтөч” булангийнхаа энэ удаагийн дугаарыг хятад хэл сурч байгаа хүмүүст зориуллаа.
1. Hanbridge Mandarin
“Hanbridge Mandarin” юүтүб сувгийг мэргэжлийн багш нар хөтлөн явуулдаг бөгөөд хичээлээ англи хэлээр заадаг. Мөн өргөн хүрээний сэдвийг хамарсан цэгцтэй мэдлэгийг өгөх бөгөөд хичээлүүд нь үнэ төлбөргүй байдаг.
2. HSK Test Preparation and Practice
Хятадын компанид ажиллах хүсэлтэй гадаад иргэд, эсвэл хэлний түвшингээ шалгаж, ахиулахыг хүссэн хүмүүст энэ сувгийг дагахыг зөвлөж байна. Хятад багш Shasha HSK-ийн түвшнүүдэд тохирсон цуврал видео бичлэгүүдийг байршуулсан байдаг.
3. Yangyang Cheng
Yangyang Cheng бүсгүй АНУ-д амьдардаг бөгөөд тэрээр гэрийн эзэгтэйн үүргээ гүйцэтгэж байхдаа онлайнаар хүмүүст хятад хэлний хичээл заах санаагаа олжээ. Тэрээр өмнө нь хөтлөгч байсан бөгөөд өөрийн туршлага дээр үндэслэн юүтүбд видео байршуулж эхэлсэн байна. Та хятад хэлний анхан шатны мэдлэгээ дээшлүүлж, дүрмүүдийн талаар мэдлэгтэй болохыг хүсвэл энэ сувгийг сонирхоод үзээрэй.
4. ShuoshuoChinese
Хятад хэлний багшаар олон жил ажилласан туршлагатай Shuo Хятад улсад өргөн хэрэглэгддэг хэлц үг, аман ярианы нэршлүүдийг маш ойлгомжтой тайлбарладаг. Тэрээр мөн хятад хэл, соёлын талаар маш сонирхолтой мэдээллүүдийг хүргэдэг.
5. Everyday Chinese
Тус юүтүб суваг нь үг хэллэг, дүрмийн хичээлүүдийг заадаг. Мөн Хятад соёлын талаар ойлгомжтой мэдээллүүдийг өгөх болно. Өдөр тутмын яриа, үг хэллэг, дүрмээ сайжруулахаар зорьж буй хүмүүс энэ сувгаар зочлоорой.
6. Litao Chinese
Litao Chinese суваг нь системчилсэн цэгцтэй мэдлэгийг танд өгөх болно. Хичээлүүдээ англи хэл дээр заадаг бөгөөд видеонууд нь хэт урт биш тул таныг залхаахгүй.
Эх сурвалж: digmandarin, hanbridgemandarin
