Улаан хоолойн хорт хавдраас хэрхэн сэргийлэх талаар ХСҮТ-ийн цээжний хөндийн мэс заслын их эмч П.Зундуйдорж мэдээлэл өгснийг сийрүүлэн хүргэж байна.
Улаан хоолойн хавдар үүсэхэд ямар хүчин зүйлс нөлөөлдөг вэ?
Ямар нэг эрхтний эд эс өөрийн үйл ажиллагааг явуулж чадахгүй эрчимтэйгээр олширч, хяналтгүй болохыг л хавдар гээд байгаа юм. Харин улаан хоолойн хавдар үүсэхэд халуун хоол цайг хурдан идэж уух, архи тамхины хэрэглээ, удаан хугацаанд сөөргөөтэй байх, жимс болон хүнсний ногоог бага хэрэглэх, цөсний хүүдий авхуулах, зарим вирусийн халдвар, хеликобактери, таргалалт зэрэг нь нөлөөлдөг.
Эдгээрээс хамгийн өндөр эрсдэлтэй нь халуун уух юм, сөөргөө, архи тамхины хэрэглээ, жимс болон хүнсний ногоог бага хэрэглээ гэж үздэг.
Улаан хоолойн хорт хавдрын үед түгээмэл илэрдэг шинж тэмдэг нь юу вэ. Ямар оношилгоо хийлгэх вэ?
Улаан хоолой нь хоолыг ходоодруу дамжуулан өнгөрүүлэх зам. Энэ замд саад гарч эхэлдэг. Тухайлбал горойх шинж илэрнэ. Хүмүүс бүхэл хоол идэхээр горойж, гаргаад байна гэдэг.
Оношилгооны хувьд, улаан хоолой нь хөндий эрхтэн учраас дурандуулах хэрэгтэй. Сүүлийн нэг хоёр жил хавдрууд эрт үедээ оношлогдож байгаа. Энэ нь улс орон даяар явагдаж буй урьдчилан сэргийлэх үзлэгтэй холбоотой гэж бодож байна. Үүнтэй холбоотой хожуу үеийн хавдрын тоо арай багасаж байна. Энэ бол сайн үзүүлэлт.
Улаан хоолойн хорт хавдраас хэрхэн сэргийлэх вэ?
Хавдар нь халдварт, хурц өвчин биш шүү дээ. Удаан хугацаанд үүсдэг архаг өвчин. Тиймээс урьдчилан сэргийлэх боломжтой. Үүнээс сэргийлэхийн тулд дээр дурдсан эрсдэлт хүчин зүйлийг анхаарах хэрэгтэй.
Жишээлбэл, халуун цайг хөргөж эсвэл аажуу, удаанаар уух, жимс хүнсний ногоо түлхүү хэрэглэж, сөөргөөг эмчлэх нь зүйтэй. Мөн жилдээ нэг дурангийн оношилгоо хийлгэж байхыг зөвлөе.
