ХӨСҮТ-өөс томуу, томуу төст өвчний болон коронавирусийн халдварын нөхцөл байдал, дархлаажуулалт болон ерөнхий боловсролын сургуулиудын хичээл эхлэхтэй холбогдуулан зөвлөмж, мэдээлэл өгч байна.
ХӨСҮТ-ийн дарга Ц.Билэгтсайхан “Манай улсад коронавирусийн халдвараар 11 хүн эмнэлэгт хэвтэн эмчлүүлж байгаа бол 16 хүн хяналтад байна. 16 сорьцын 15-д нь Омикроны B.Q1.2 дэд хувилбар, нэг сорьцод BA.5.2 гэдэг хувилбар илэрсэн.
Замын-Үүд-Эрээний хилийн боомт нээгдсэнтэй холбоотойгоор ЭМЯ, ХӨСҮТ, гааль, мэргэжлийн хяналтын байгууллагууд хамтарч ажиллаж байгаа. Боомтоор ирж байгаа гадаадын болон дотоодын иргэдээс түүвэрлэн тандалтыг хийж байна.
Тухайлбал, урд хил нээгдсэнээс хойш дотоод, гадаадын 365 хүнийг PCR шинжилгээнд хамруулахад өнөөдрийн байдлаар эерэг тохиолдол гараагүй. Үүнээс гадна коронавирусийн эсрэг вакцинжуулалтыг дэмжих, эмнэлгийн орны болон эмийн нөөцийн бэлэн байдлыг хангаж байна.
Цагаан сар болох гэж буйтай холбогдуулан иргэд урд хөрш рүү явах гэж төлөвлөж байгаа байх. Эдгээр иргэдэд анхааруулж хэлэхэд урд хөршид коронавирусийн халдварын тохиолдол өндөр хэвээр байна. Манай улсад бүртгэгдээгүй шинэ хувилбарууд байгаа тул эрсдэлээ тооцоолж бизнес, аяллаа төлөвлөхийг зөвлөе” гэв.
Мөн ирэх Даваа гарагт ЕБС-ийн хичээл эхлэх тул ханиад томуунаас сэргийлэн амны хаалтаа зүүж хэвшихийг эмч, мэргэжилтнүүд зөвлөлөө.