ЭХЭМҮТ-ийн Эмнэлгийн тусламж үйлчилгээний чанарын албаны дарга А.Оюунчимэгийн суулгалт өвчний талаар өгсөн мэдээллийг сийрүүлэн хүргэж байна.
Суулгалт өвчнийг үүсгэгч нь вирус. Мөн нян юм. Хүүхдэд ихэвчлэн тохиолдож байгаа нь вирусийн гаралтай суулгалт өвчин байна. Суулгалт юунаас үүссэн ч бай хамаагүй хүүхдэд илрэх үндсэн шинж нь бол олон удаа шингэнээр баах юм. Үүнийг усан чацга ч гэж нэрлэдэг.
Хүүхэд дүлэлттэй байна уу, нэг удаагийн өтгөний хэмжээ их, бага байна уу, зовиуртай байна уу, үгүй юу гэдгийг эцэг эх нь анхаарч байх ёстой. Жишээлбэл, хүүхдийн өтгөн их хэмжээтэй, бижирмэгтэй, шар өнгөтэй, хүүхдэд зовиургүй, дүлэхгүй, усан суулгалт гараад байгаа тохиолдолд шингэн сайн уулгах ёстой.
Гэтэл хүүхэд халуунтай, бага хэмжээний дүлэлттэй, цустай бааж байгаа тохиолдолд цусан суулга байх боломжтой учир яаралтай эмнэлэгт хандана.
Суулгалт өвчний үед шингэн хангалттай уулгахыг зөвлөдөг. Мөн бөөлжихгүй байгаа тохиолдолд хэдэн мл шингэн гарч байгааг нүдэн баримжаагаар хараад, тэр хэмжээгээр л шингэн уулгах ёстой.
Суулгалт өвчний гол хүндрэл нь усгүйжилт юм. Яагаад усгүйжилтийн хүндрэл үүсдэг вэ гэхээр баасаар гарч байгаа усны хэмжээгээр шингэн өгөхгүй болохоор хүүхдийн бие усгүйждэг. Гарч байгаа баас, уулгаж байгаа усны хэмжээ таарахгүй байвал усгүйжилтийн шок үүсдэг. Тиймээс хүүхдийг усгүйжүүлэхгүйн тул шингэн зүйл сайн уулгах хэрэгтэй.
Энэ үед хүүхдэд шингэн сэлбэх давсны уусмал өгнө. Буцалсан усыг тасалгааны хэм хүртэл хөргөж, 1 литр усанд нэг уут шингэн сэлбэх давс /хросол/-ыг бүгдийг хийж, бүрэн уустал сайтар хутгана. Хросолоо найруулахдаа савны бүрэн байдал, хугацааг шалгах ёстой.Мөн зааврыг дагаж мөрдөнө.
Нэг литр шингэн сэлбэх давсны найрлага, нэг литр баасны найрлагатай тэнцүү байдаг. Хүүхэд өтгөнөөрөө глюкоз, кали, натри зэргийг алддаг. Үүнийг нь хросолоор нөхөж байна гэсэн үг. Түүнээс энэ нь өтгөнийг тогтоох үйлчилгээ байхгүй. Харин алдаж буй усыг нөхөж өгөх үйлчилгээтэй байдаг. Хүүхэд бөөлжихгүй байвал та бүхэн хросолыг халбагаар ойр ойрхон уулгах ёстой.
Нэг аяга бантан идчихдэг хүүхэд суулгалтын үед уурлаад идэхгүй. Тиймээс түүнийг бага багаар өгч, дагаад л хооллоод байна. Суулгалт өвчтэй байгаа хүүхдэд эцэг эхийн асаргаа маш чухал.
Түүнчлэн ДЭМБ болон эмч нар цайр өгөхийг зөвлөдөг. Суулгалтын үед цайрыг заавал өгнө. Цайр нь хүүхдэд өгөхөд хэцүү, аргаагаад байдаг. Гэхдээ үүнийг 14 хоног өгөх ёстой. Өтгөн нь хэвийн болсон ч өгөх хэрэгтэй байдаг. Үүний тунг нь үзэж буй эмч нь мэдэж, хэлж өгнө. Эх, хүүхдийн ягаан дэвтэр дээр өгөх ёстой гэж бичигдсэн байдаг А витамин нь арьс, салст, нүдний хараанд үр дүнтэй. Тиймээс А витаминаа хугацаандаа ууж байсан хүүхдийн арьсны тууралтад өвчин, суулгалт өвчин нь хүндэрдэггүй.
Эх сурвалж: ЭХЭМҮТ