Монгол хэл бичгийн шалгалтын үр дүн, багшийн болон байгууллагын үнэлгээний талаар Боловсролын Үнэлгээний Төв (БҮТ)-өөс мэдээлэл хийлээ.
Улсын хэмжээнд 30,879 шалгуулагч хэл бичгийн шалгалтад хамрагдсан байна. Эдгээр шалгуулагчаас
- 26,017 сурагч тэнцсэн
- 4,862 сурагч тэнцээгүй байна.
Боловсролын үнэлгээний төвийн дарга Д.Ганбат: ЭЕШ-ын өмнө төгсөгчдөөс заавал авдаг монгол хэл, бичгийн шалгалтыг авч дууссан. Энэ жилийн шалгалтад 32533 шалгуулагч бүртгүүлсэн байснаас 30879 нь оролцсон. Үүнээс 400 онооны босгоо давсан 26017 бол, 4862 шалгуулагч босго оноогоо даваагүй. Тухайлбал, Архангай аймгийн хувьд жишээлбэл, 816 шалгуулагч хамрагдсанаас 667 шалгуулагч босго оноогоо давсан.
Баян-Өлгий аймгийн хувьд 883 шалгуулагч энэ жилийн монгол хэл, бичгийн шалгалтад оролцлоо. Үүнээс 322 нь босго оноогоо давсан байна. Харин босго оноондоо хүрээгүй 561 шалгуулагч байна. Монгол хэл, бичгийн хоёр дахь удаагийн шалгалтыг 8 дугаар сард зохион байгуулна.
2013 оноос их, дээд сургуульд элсэх шалгуулагчдаас Монгол хэл бичгийн шалгалтыг заавал авч эхэлсэн. Шалгалтын босго оноог 400 байхаар тогтоож ирсэн. Монгол хэл бичгийн шалгалтдаа 400 ба түүнээс дээш оноо авснаар дотоодын их, дээд сургуулиудад элсэх эрх нь нээгддэг онцлогтой.
Шалгалтын гол зорилго нь эх хэлний боловсролын чанар, хэрэглээ, хүртээмжийг сайжруулахад оршино. Монгол хэл бичгийн шалгалтыг
- Зөв бичих чадвар
- Монгол бичгээр унших чадвар
- Эх зохион найруулах чадварыг шалгах агуулгын хүрээнд авсан.
