УИХ-ын чуулганы үдээс хойших нэгдсэн хуралдааннаар Олон нийтийн сүлжээнд хүний эрхийг хамгаалах тухай хуулийн эцсийн хэлэлцүүлгийг явууллаа.
Хуулийг эцэслэн батлах санал хураалтад 52 гишүүн оролцсоноос 40 нь дэмжиж батлав. УИХ-ын дарга Г.Занданшатар “Намын бүлгүүдийн хамтарсан ажлын хэсгийн гишүүд Олон нийтийн сүлжээнд хүний эрхийг хамгаалах тухай хуульд хүний эрхийн болон үзэл бодлоо илэрхийлэх тухайд зөрчил байгаа эсэхийг хянан үзэх хэрэгтэй.
Улмаар ийм зөрчил байвал гуравдугаар сарын 15-нд хаврын чуулганаар хэлэлцэх чиглэл өгч байна. МАН-ын болон АН-ын бүлгээс гурав, гурван гишүүн гарч хуулийн хэрэгжилт, засаж залруулах ажлыг хийнэ” гэсэн юм.
