Ардчилсан нам өнөөдөр намын даргаа сонгоно. Харин нэр дэвшигчид өчигдөр орой үнэмлэхээ авчээ. Тодруулбал, УИХ-ын гишүүн асан З.Нарантуяа, Сангийн сайд асан С.Баярцогт, БСШУ-ны сайд асан Л.Гантөмөр, УИХ-ын гишүүн С.Одонтуяа нар тус намын даргад өрсөлдөхөөр болсон байна.
Үүнтэй холбоотойгоор Ерөнхий сайд асан С.Баяр “Намаа амжилттай удирдуулмаар байвал Баярцогтыгоо сонго АН-ыхан. Дээд, доод үеийг чинь холбож чадах ганц лидер. Нам байтугай удирдчих ухаант толгой. Би мэднэ” хэмээн байр сууриа илэрхийлжээ.
АН өнөөдөр Үндэсний Бодлогын Хорооны ээлжит бус хурал болон Их хурлаа хийх юм байна. ҮБХ-ны хуралд 300 гаруй, Их хуралд 1,200 гишүүн оролцох аж. ҮБХ-ны хурлаас хамгийн олон санал авсан нэр дэвшигчийг Их хурлаараа батламжилж, намын даргын нэрийг Дээд шүүхэд хүргүүлж бүртгүүлэх дараалалтай байна.
