Хүүхдийн мөнгөнд хамрагдсан эсэхийг төрийн үйлчилгээний нэгдсэн систем e-Mongolia.mn-ээс шалгах боломжтойг албаныхан мэдээлсэн. Гэвч ердийн үеэс хэт олон хүн зэрэг хандсанаар ачааллаа дийлэхээ больж, уг системийн ажиллагаа доголдсон юм. Харин E-Mongolia.mn системийг хэвийн үйл ажиллагаанд оруулсан талаар мэдээлэв.
Энэ талаар Цахим хөгжил, харилцаа холбооны сайд Н.Учрал “Хүүхдийн мөнгө авах эсэх мэдээллийг нэгдүгээр сарын 16-наас e-Mongolia.mn-д холбож, харуулж эхэлсэн. Тухайн өдөр 346,154 иргэний гар утсанд хүүхдийн мөнгө авах тухай мэдээллийг зурвасаар илгээснээс 109,717 нь баталгаажуулах байдлаар e-Mongolia.mn-ээс шалгасан байна.
Нэгдүгээр сарын 18-ны өдрийн байдлаар давхардсан тоогоор 371,656 иргэн хүүхдийн мөнгө авах боломжтой эсэхийг шалгаж, холбогдох хүсэлтүүдээ өгсөн.
Нэгдүгээр сарын 16-ны оройн 22:00 цагийн байдлаар 300,000 хүн зэрэг хандсан. Энэ нь энгийн үеийнхээс 15-20 дахин нэмэгдсэн. Бид мэдээлэл хариуцагч нарын мэдээллийг иргэддээ e-Mongolia.mn-ээр дамжуулж харуулах бэлтгэлээ хангахдаа ачааллыг 10 дахин нэмэгдүүлэхэд сервер унах эрсдэлгүй гэж тооцоолсон. Гэвч 20 дахин нэмэгдсэнээр хэт их ачааллын үед сервер унах, дийлэхгүй байх нөхцөл үүссэн. Иймд Дархан-Уул аймаг дахь Дата төвөөс нэмэлт төхөөрөмж авчран байршуулж, e-Mongolia.mn системийг хэвийн үйл ажиллагаанд оруулсан” гэв.
