УИХ-ын чуулганы нэгдсэн хуралдаанаар Нүүрсний асуудлаарх Ерөнхий хяналтын сонсголын тайлантай холбогдуулан авах арга хэмжээний тухай тогтоолын төслийг хэлэлцэж байна.
Тогтоолын төсөлтэй холбогдуулан УИХ-ын гишүүн Ж.Батжаргал “1,072 хувьцааны өнгөрсөн он жилүүдийн ногдол ашгийг хуваарилах асуудлыг нарийн судалж, тодорхой арга хэмжээ авах хэрэгтэй. Болж өгвөл сар шинээс өмнө хийх хэрэгтэй байгаа. Нөхцөл байдал амаргүй байна, монголын ард түмэн баялгийнхаа үр өгөөжийг хүртэх ёстой.
Тийм учраас 2021, 2022 оны ногдол ашгийг нэг, хоёрдугаар сард багтаан хүртэх боломжийг төр бүрдүүлэх ёстой” хэмээн ажлын хэсгийнхэнд хэлэв.
Хариуд нь УИХ-ын гишүүн, ЭМ-ийн сайд С.Чинзориг “Эрдэнэс Тавантолгой” ХК-ийн хувьцааг иргэдэд эзэмшүүлэх, үр өгөөжийг нэмэгдүүлэх нь чухал асуудал болоод байна. Тус компанийн хөрөнгөд дахин үнэлгээ хийж, 1,072 хувьцааны нэгж хувьцааны үнийг шинээр тогтоох шаардлагатай. Энэ хүрээнд тогтоолын төсөлд хоёр заалт тусгасан.
- 2012 оны дөрөвдүгээр сарын 1-ний өдрөөс хойш төрсөн хүүхдүүдэд хувьцааг шинээр эзэмшүүлэх
- Сүүлийн жилүүдэд 1,072 хувьцааны ногдол ашгийг иргэдэд өгөөгүй бөгөөд үүнийг нөхөн олгох заалтыг энэ төсөлд оруулсан” хэмээв.