ОХУ-ын эрэгтэйчүүд Украйны дайнд цэргийн дайчилгаанд татагдахгүйн тулд эх орноосоо гарах гэж хил дээр урт дараалал үүсгэсэн тухай BBC агентлаг мэдээлэв.
ОХУ-ын Ерөнхийлөгч Владимир Путин лхагва гарагт хэсэгчилсэн цэргийн дайчилгаа зарласан бөгөөд үүнд 300,000 хүн дуудагдсан байна.
Харин байлдааны насны эрчүүд эх орноосоо зугтаж байгаа гэх мэдээллийг хэтрүүлсэн гэж Кремл үзэж байгаа юм. Гэвч Гүрж улсын хил дээр цэргийн дайчилгаанд оролцох хүсэлгүй эрчүүд урт дараалал үүсгэсэн байгааг хэвлэлүүд онцолжээ.
Нэрээ хэлэхийг хүсээгүй нэгэн эр ВВС-гийн сурвалжлагч Райхан Демитрид хэлэхдээ, Путины мэдэгдлийн дараа тэр даруй паспортоо “шүүрч” аваад хил рүү ирсэн гэжээ.
Зарим эх сурвалжууд шалган нэвтрүүлэх боомт дахь автомашины дараалал 5 км орчим байна гэж тооцоолсон бол өөр нэг хэсэг нь хилээр гарахад долоон цаг зарцуулсан тухай мэдэгджээ.
Дашрамд дурдахад, ХБНГУ-ын Дотоод хэргийн сайд цэргийн албанаас зугтсан оросуудыг эх орондоо хүлээн авна хэмээн мэдэгдээд буй.
Эх сурвалж: BBC
