Эрүүл мэндийн даатгалын ерөнхий газрын ЭЗТХС-ийн ахлах мэргэжилтэн Г.Мөнхцацрал өндөр өртөгт оношилгоо, шинжилгээний талаар дараах мэдээллийг өглөө.
Тэрээр “Эрүүл мэндийн даатгалын ерөнхий газрын даргын 2022 оны А/53 тоот тушаалаар ЭМД-ын сангаас санхүүжүүлэх өндөр өртөгтэй оношилгоо, шинжилгээний жагсаалтыг баталсан.
Энэхүү жагсаалтад жирэмсний ургийн гажиг тодорхойлох хоёр төрлийн шинжилгээ багтсан байдаг.
Нэгдүгээрт, ураг орчмын шингэнд FISH анеуплойд тодорхойлох шинжилгээ. Уг шинжилгээний нийт өртөг 30,000 төгрөг. Харин ЭМД-ын сангаас 21,000 төгрөг буюу 70 хувь, иргэнээс 9,000 төгрөг буюу 30 хувийг төлүүлэхээр тусгасан.
Хоёрдугаарт, ураг орчмын шингэн, цэлмэнгийн эдийг тодорхойлох шинжилгээ байдаг. Уг шинжилгээ 540,000 төгрөгийн үнэтэй. Харин ЭМ-ийн даатгалаар хөнгөлж, ЭМД-ын сангаас 378,000 төгрөг буюу 70 хувийг, иргэнээс 162,000 төгрөг буюу 30 хувийг төлүүлэхээр зохицуулсан байдаг” гэлээ.