ЗХУ-ын Ерөнхийлөгч асан “Өөрчлөн байгуулалтын” эцэг гэгддэг Михаил Горбачев Москвагийн Клиникийн төв эмнэлэгт 91 насандаа таалал төгссөн юм. Иймд Гадаад харилцааны яамнаас дараах эмгэнэлийг нийтэлжээ.
“Зөвлөлт болон Оросын төр, нийгмийн нэрт зүтгэлтэн, Зөвлөлт Холбоот Улсын Коммунист намын Төв хорооны сүүлчийн Ерөнхий нарийн бичгийн дарга Михаил Сергеевич Горбачев таалал төгссөн явдалд түүний гэр бүл, төрөл төрөгсдөд Монгол Улсын төр засаг гүн эмгэнэл илэрхийлж байна.
Михаил Сергеевич Горбачевын эхлүүлсэн шинэчлэл нь хуучин ЗСБНХУ-ын хувьд түүхэн үйл явдал болсноос гадна дэлхий дахин, олон ард түмэнд томоохон өөрчлөлт авчирсан билээ.
Тэрээр монголын ард түмний сэтгэлд шинэчлэл, өөрчлөн байгуулалт, ардчиллын бэлгэ тэмдэг болон үлдсэн болно” гэжээ.
