Нийслэлийн прокурорын газраас УИХ-ын нэр бүхий дөрвөн гишүүнд хилийн хориг тогтоох тухай саналыг шүүхэд хүргүүлжээ.
Тодруулбал, УИХ-ын гишүүн Н.Алтанхуяг, Х.Ганхуяг, Г.Амартүвшин, Ё.Баатарбилэг, мөн Хөгжлийн банкны захирал асан Б.Батбаяр нарт Хөгжлийн банкны зээлийн эргэн төлөлт, чанаргүй зээлтэй холбоотойгоор Монгол Улсын хилээр гарахыг хязгаарлах таслан сэргийлэх арга хэмжээ авах саналыг шүүхэд ирүүлсэн байна.
Эрүүгийн хэрэг хянан шийдвэрлэх тухай хуулийн 14.5.1 дэх хэсгийг үндэслэн Монгол Улсын хилээр гарахыг хязгаарлах, таслан сэргийлэх арга хэмжээ авхуулах прокурорын саналыг Сүхбаатар дүүргийн Эрүүгийн хэргийн анхан шатны шүүх өнөөдөр шийдвэрлэх аж.
Өмнө нь тэдний бүрэн эрхийг түдгэлзүүлэх саналыг Улсын ерөнхий прокуророос УИХ-д хүргүүлсэн билээ. Гэвч УИХ-ын гишүүний Халдашгүй байдлын дэд хорооны хуралдаанаар УЕП-оос гаргасан саналын дэмжих боломжгүй гэж үзсэн юм.
Тодруулбал, “УЕП, холбогдох байгууллагууд, нэр бүхий гишүүдээс мэдүүлэг, тайлбар авлаа. АТГ-аас гишүүдийг нэг л удаа дуудаж, гэрчээр оруулсан. Гишүүдийн зүгээс мөрдөн шалгах ажиллагаанд ямар нэгэн саад учруулаагүй” гэх үндэслэлээр прокурорын саналыг хүлээж аваагүй хэмээн тайлбарлаж байв.