Нийслэлийн Мэргэжлийн Хяналтын Газраас Эмээлт дэх мах бэлтгэлийн газарт хийсэн лабораторийн шинжилгээний талаар мэдээлэл хийлээ.
НМХГ-ын Хүнсний аюулгүй байдал, хөдөө аж ахуйн хэлтсийн дарга Х.Нямбаатар “Эм Ди Си Пи компанид мэргэжлийн хяналтын байгууллагаас шалгалт хийгээд, прокурорт зөрчлийн хэрэг нээх саналаа хүргүүлсэн.
Тухайн компанийн мах боловсруулах үйлдвэрийн орчин нь мал эмнэлэг, ариун цэврийн эрүүл ахуйн шаардлага хангаагүй. Үйл ажиллагаандаа үйлдвэрлэлийн зохистой дадал нэвтрүүлээгүй, цехийн цэвэрлэгээ ариутгал хангалтгүй байсан. Технологийн зааваргүй хугацаа нь дууссан бүтээгдэхүүн хэрэглэж байсан. Тухайн үйлдвэр зөрчил гаргасан өдрөөс хойш үйл ажиллагаа явуулаагүй.
Мах боловсруулах үйлдвэрт байсан нунтаг цагаан бодис нь хүнсний цардуулын өндөр агууламжтай нийлмэл бодис гэсэн дүгнэлт гарсан” гэлээ.
Тус газрын Эрүүл мэнд, боловсрол соёлын хяналтын хэлтсийн дарга Д.Цэнд-Аюуш “Эм Ди Си Пи компанийн мах боловсруулах үйлдвэрийн гүний худгийн уснаас дээж авч, МХЕГ-ын харья Хүнсний аюулгүй байдлын лавлагаа лабораторид тавдугаар сарын 11-нд шинжлүүлсэн.
Тухайн гүний худгийн ус нь Монгол Улсад мөрдөгдөж байгаа ундны усны чанар аюулгүй байдлын стандартын шаардлагыг хангахгүй байна” гэлээ.
Уг үйлдвэрийн хэрэглэж байсан цагаан өнгийн уусмалын бодисын найрлагыг таних зорилгоор дээж авч, хүнсний аюулгүй байдлын лабораторид шинжлүүлсэн.
Уг дүгнэлтээс үзэхэд үйлдвэрлэлийн технологийн дамжлагад хэрэглэж буй цагаан өнгөтэй уусмал нь чанар аюулгүй байдлын шаардлагыг мөн хангахгүй байгаа юм. Уусмалын найрлагад шинжилгээгээр цардуул, нитрит, натрийн хлоридын агууламж их байна” гэв.
Түүнчлэн тус компанийн махны шинжилгээнээс ходоод гэдэсний эмгэг судлалын өвчин үүсгэх бодис илэрсэн нь тогтоогджээ.
Тухайн махыг экспортод гаргахаар төлөвлөж байсан байна. Одоогийн байдлаар мах лацтай хэвээрээ байгаа талаар мэдээллээ. Шалгалтын эцсийн дүн гарсны дараа уг махыг устгах, хураах, улсын орлого болгох эсэхийг шийдэх аж. Гэмт хэргийн шинжтэй байх юм бол тусгай чиг үүргийн байгууллагад тус асуудал шилжинэ.
Уг компанийн ажлын байрны дүгнэлтийг хүчингүй болгосон байна. Иймээс цаашид Эм Ди Си Пи компани өөрийн нэрээр махны үйл ажиллагаа явуулах боломжгүй гэсэн үг гэдгийг албаныхан хэлэв.
