Хөдөлмөр, халамжийн үйлчилгээний ерөнхий газраас БНСУ-д хөдөлмөрийн гэрээгээр ажиллах хүсэлтэй иргэдийн хэлний шалгалтын бүртгэлийн талаар мэдээлэл хийлээ.
Тус газрын хувьд БНСУ-ын Аж үйлдвэр, хүний нөөцийн газартай хамтран ажиллах хүч илгээх үйл ажиллагааг зохион байгуулдаг бөгөөд энэ жилийн хувьд 4500 иргэнийг бүртгэх аж. Бүртгэлийг ehalamj.mn системээр хийж, тоо гүйцсэн тохиолдолд систем автоматаар хаагдана.
Солонгос хэлний түвшин тогтоох шалгалтын бүртгэлийг энэ сарын 26-ны өглөөний 09:00 цагаас цахимаар зохион байгуулах ба сонирхсон иргэд бүртгүүлэх боломж нээлттэй. Шалгалтыг наймдугаар сард батлагдсан хуваарийн дагуу зохион байгуулна. Ийнхүү онооны аргачлалаар 350 хүртэлх иргэнийг хүний нөөцөд бүртгэж, Солонгосын талаас ажил олгогч санал тавьсны үндсэн дээр гэрээ байгуулснаар Солонгос руу илгээгдэх ажил зохион байгуулагдана.
Шалгалтанд бүртгүүлэх иргэн 24 ам.доллар төлөх бөгөөд долдугаар сарын 1-нээс төлбөр нь 28 ам.доллар болж нэмэгдэх аж.