Байнгын хорооны хуралдаанаар Монгол Улсын Ерөнхийлөгч У.Хүрэлсүхийн санаачилсан “Хүнсний хангамж, аюулгүй байдлын талаар авах зарим арга хэмжээний тухай” тогтоолын төслийг хэлэлцэж байна.
Энэ үеэр УИХ-ын гишүүн Б.Өнөрболор: Хүнсний аюулгүй байдал бол зөвхөн хүнс бус эрүүл мэнд, боловсролын асуудалтай шууд холбоотой. Өнөөгийн байдлаар хүн амын нийт нас баралтын тэргүүлэх таван шалтгааны нэг нь хоол боловсруулах тогтолцооны өвчин байна. Хүнсний аюулгүй байдал нийгмийн эрүүл мэндэд ноцтой үр дагавар хүргэх түвшинд хүрсэн нь өнөөгийн олон судалгаанаас харагдаж байна.
Тиймээс эрүүл хооллолт, зохистой хэрэглээ, амин дэм, эрдэсээр баялаг хоол хүнс хэрэглэхийн ач холбогдлыг таниулахад яамдууд хамтарч ажиллах шаардлагатай.
Хөгжлийг дагаад хүнсний бүтээгдэхүүн, хүнсний нэмэлт бүтээгдэхүүнд тавигдах стандарт шинэчлэгдэж байгаа. Стандартын хэрэгжилтийн талаар хийсэн судалгаа, шинжилгээ манайд байдаггүй юм байна. Зөвхөн 2020 оны байдлаар 623 стандарт хэрэгжиж байгаа гэсэн тоо байна. Ямар стандарт хэрэглэж байгаа, тэр нь зөв үү, буруу юу гэдэг нь огт ойлгомжгүй. Ихэнх лабораторын үйл ажиллагаа шаардлага хангахгүй түвшинд хүржээ. Хүнсний бүтээгдэхүүний аюулгүй байдлыг бүрэн хангахуйц шинжилгээ хийдэг байх ёстой гэдэг асуудал ноцтой түвшинд хүрсэн гэж ойлгогдож байна.
