УИХ-ын Чуулганы нэгдсэн хуралдаанаар Улсын нэгдсэн төсвийн 2023 оны төсвийн хүрээний мэдэгдэл 2024-2025 оны төсвийн төсөөллийн тухай хуулийн төсөл болон хамт өргөн мэдүүлсэн хуулийн төслүүдийг хэлэлцэж байна.
Энэ үеэр УИХ-ын гишүүн Б.Энхбаяр: Төсвийг тойрсон хулгайн томоохон схем УИХ-д байна. Засгийн газраас өргөн барьсан төслийг Төсвийн байнгын хороо, нааш, цааш болгодог юм байна. УИХ-ын гишүүний улс төрийн хувь заяа, дахин сонгогдох, тойрогтоо жаахан юм хийж чадах эсэх бүгд асуудлыг Төсвийн байнгын хороо базаад сууж байдаг, гишүүдийг ялгадаг, царай хардаг, хадаг бариулж гуйлгадаг.
Миний хувьд БЗД-ийн хамгийн олон хүн амтай 26-р хороонд сургууль барихаар 2022 оны төсөвд 5 тэрбумыг суулгасан ч хэмнэлтийн бодлогоор гээд 1,4 тэрбумыг хасчихсан.
Гишүүдийн тойрогтоо зарцуулах хөрөнгө оруулалтаас хасагдаж байгааг хэмнэлт гэж ойлгож байсан ч бусад гишүүдийн тойрогт нэмэгдчихжээ. 2022 оны Төсвийн тодотголоор Увс аймагт нэмэгдсэн. Баянзүрх дүүрэгт “Шинэ хөдөө төсөл” гээд нэмэгдчихсэн байна лээ. Улаанбаатар хотын хамгийн хотожсон дүүрэг гэж ойлгодог. Гэтэл юун хөдөө төсөл болоод явчихав, хэн хэрэгжүүлэх гэж байгаа юм.