Ирэх наймдугаар сараас дэлхий дахинаа халдварын BA4, BA5 хувилбарын шинэ давлагаа үүсэх эрсдэл өндөр байгаа учир амны хаалтаа тайлах болоогүй талаар УОК-ын дэргэдэх Эрдэмтдийн зөвлөлийн нарийн бичгийн дарга О.Батбаяр анхааруулжээ.
Тэрбээр хэвлэлд ярилцлага өгөхдөө “Бид амны хаалтаа тайлах болоогүй. Дэлхийн улс орнууд цар тахлын тав дахь давлагаанд бэлдэж байна. Учир нь Омикроны BA4, BA5 хувилбар дэгдэж байна.
Улс орнуудад ойрын үед буюу наймдугаар сараас халдварлах чадвар, нас баралт өндөртэй ковидын шинэ давлагаа үүсэх эрсдэлтэй байна” гэжээ.
Мөн тэрбээр “Ковид-19-ийн одоогийн нөхцөл байдал омикроны давлагааны үетэй харьцуулахад буурсан үзүүлэлттэй байгаа. Гэхдээ олон нийтийн дунд BA2 гэх халдварын шинэ хувилбар тархаж байна. Шинж тэмдгийн хувьд бол амьсгалын дээд замын халдварын шинж тэмдгийг агуулж байгаа. Хоолой өвддөг, хамраас цус гоожих шинж тэмдэг илэрч байна” хэмээжээ.