Чуулганы нэгдсэн хуралдааны үеэр Сангийн сайд Б.Жавхлан НӨАТ-ын сугалааг явуулахгүй болсон талаар мэдээлжээ.
Тэрбээр, “НӨАТ-ын асуудал нэлээд олон нийтийн анхаарлыг татдаг. Төсөвтэй холбоотой эерэг, сөрөг олон асуудал гардаг. Шулуухан хэлэхэд аль болох НӨАТ-ын тогтолцоог хөндмөөргүй байна. Шинэ эдийн засгийн тогтолцоонд орсон сүүлийн 32 жил бидний бий болгосон маш зөв татварын тогтолцооны нэг систем нь энэ. Дэлхийн 160 улсад байдаг сонгодог татварын тогтолцоо. Манай 10 хувь тийм өндөрт орохгүй. Манайхаас гадна 36 улс 10 болон түүнээс доош хувьтай байгаа. БНХАУ-д 13, ОХУ-д 20, европын бүс 21 хувь байх жишээний.
2015 онд 46 хувьтай байсан НӨАТ-ын хамрагдалт одоо дөнгөж 61 хувьтай байна. Бидний зорилго бол 90 хувьд хүргэх бодлоготой. Төсвийн орлого бүрдүүлэлтэд маш найдвартай, тогтвортой орлого болж ирсэн бөгөөд төсвийн нийт орлогын 22 хувийг эзэлдэг. Жилдээ 3,7 ихнаяд төгрөгийн НӨАТ-ын орлого бүрддэг.
Далд эдийн засгийг ил болгодог НӨАТ-ын системийг бид цаашид улам хөгжүүлэх, тогтвортой байлгах хэрэгтэй. Сугалааг больсон. Энэ сараас больж байгаа. Сугалаа түүхэн хугацаанд тодорхой үүргээ гүйцэтгэсэн. Ойрын жилүүдэд буцаан олголтыг хоёр хувьдаа тогтвортой барих бодлоготой байгаа” хэмээжээ.
