Өвөр Кавказын салан тусгаарласан бүс нутаг болох Өмнөд Осет ОХУ-ын бүрэлдэхүүнд нэгдэх хүсэлтээ илэрхийлжээ.
Тус улсын Ерөнхийлөгч Анатолий Бибилов мэдэгдэлдээ “Оростой нэгдэх нь бидний стратегийн зорилго гэдэгт би итгэдэг. Энэ бол бидний замнал, ард түмний хүсэл эрмэлзэл. Бид энэ замаар явж, ойрын хугацаанд хуулийн дагуу зохих арга хэмжээг авах болно. Өмнөд Осетийн Бүгд Найрамдах Улс түүхэн эх орон болох Оросын нэг хэсэг болно” хэмээжээ.
Гүрж, Орос хоёр улс Абхаз, Өмнөд Осетийн газар нутгийн асуудлаас болоод олон жилийн турш дайсагналцсан. 2008 онд Оросын цэрэг эдгээр бүс нутгуудад нэвтэрч, Гүржийн армитай дайтаж байв.
Дайны дараа ОХУ-ын эрх баригчид тус улсын тусгаар тогтнолыг нь хүлээн зөвшөөрсөн билээ.
Дэлхийн ихэнх улс орон Өмнөд Осетийг Гүрж улсын нэг хэсэг гэж үздэг. Харин ОХУ, Венесуэл тэргүүтэй цөөн хэдэн улс тус улсын тусгаар тогтнолыг хүлээн зөвшөөрсөн юм.
Эх сурвалж: Russia Today