Шүүхийн сахилгын хорооны анхны хуралдаан өнөөдөр болж, ёс зүйгүй авирласан шүүгч нарын асуудлыг хэлэлцлээ. Хуралдаанд эрүүл мэндийн шалтгаанаар оролцох боломжгүй Д.Отгонбаатарын хурал хойшлуулах хүсэлтийг хүлээж аваагүй ч хэргийн материалтай танилцах өмгөөлөгчийн хүсэлтийг хүлээн авч, хурлыг долоо хоногоор хойшлууллаа.
Ийнхүү шүүхийн сахилгын хороогоор тус асуудлыг 2022 оны нэгдүгээр сарын 20-ны өдрийн 09:00 цагт хэлэлцэхээр боллоо.
Хэргийг сануулбал, өнгөрсөн онд өмгөөлөгч Б.Баасанцогт, шүүгч Х.Идэр, З.Болдбаатар, Д.Отгонбаатар, АТГ-ын ажилтан П.Чулуунбаатар нарын лифтэнд зүй бус авирлаж буй бичлэг цацагдсан. Дээрх гурван шүүгчид сахилгын арга хэмжээ авах тухай гомдлыг “Нэхүүл”, “Дархан Монгол ногоон нэгдэл” төрийн бус байгууллагуудаас Шүүхийн сахилгын хороонд гаргасан юм.
Шүүхийн сахилгын хорооны хуралд шүүгч Х.Идэр, З.Болдбаатар нар биечлэн оролцсон бол Д.Отгонбаатар эрүүл мэндийн шалтгааны улмаас ирсэнгүй.
