Хөсөгтөн” хамтлагийн “Жангар” цомог Английн “Сонглайнс” сэтгүүлийн газраас шалгаруулдаг олон улсын хөгжмийн шалгаруулалтад Ази, Номхон далайн бүсээс тэргүүн байр эзэлж, Английн Лондон хотод очин, шагналаа гардаж авсан байна. Шагнал гардлуулах ёслол энэ сарын 12-нд болжээ.
Олон жил дэлхий даяар аялан тоглолт хийж, BBC телевизээс зохион байгуулдаг “BBC Prom 2011”-д эх орноо төлөөлөн оролцож, алдарт Albert Hall зэрэг дэлхийн томоохон тайзуудад үндэснийхээ язгуур урлагийн гайхамшгийг толилуулж ирсэн “Хөсөгтөн” хамтлагийг 2015 онд Asia’s Got Talent шоунд оролцсоноос хойш бүх монголчууд сайн мэддэг болсон.
Зөвхөн Монголын бус дэлхийн сонсогч нарт зориулж уран бүтээлээ хийдэг тус хамтлагийн гишүүд болох их хуурч, хөөмийч Д.Ариунболд, морин хуурч, хөөмийч В.Батзориг, цохиур хөгжимчин, хөөмийч Г.Адъяадорж, морин хуурч, хөөмийч О.Чулуунбаатар, дунд хуурч, хөөмийч Х.Уламбаяр, ятгач Ч.Амарбаясгалан нар бүгдээрээ Үндэсний Урлагийн Их Театрын хөгжимчид. Хамтлагийн таван залуу бүгд хөөмийлдгөөрөө онцлог юм. Тус хамтлаг гитар, бөмбөр, домбор, төмөр хуур, хулсан хуур, цуур, урам болон бүх төрлийн этник хөгжмүүдийг ашигладаг.