“Ногоон бөмбөлөг” сэтгэлзүйн төвөөс эрхлэн гаргадаг “Зүрхээ сонс” подкастыг албан ёсны эрхтэйгээр хүргэж байгаа билээ. Энэ удаад сэтгэл зүйч, үйлчлүүлэгч хоёрын харилцааны талаар ярилцсаныг хүргэе.
Подкаст сонсох:
Хэн нэгэн зөвлөгөө авах гээд сэтгэл зүйч, сэтгэл засалчид хандаж байгаа тохиолдолд мэргэжлийн, мэргэшсэн, ёс зүйтэй харилцаа бүрдэх ёстой. Сэтгэл зүйч үйлчлүүлэгчидтэй харилцахдаа дараах зүйлсийг анхаарна.
1. Итгэлцэл /нууцыг чандлан хадгалах/
2. Аюулгүй байдал /сэтгэл зүй, бие махбодь, орон зайн/
3. Хил хязгаар
4. Мэргэжлийн, тодорхой байх ёстой.
Итгэлт харилцаа гэж юу вэ?
Итгэлт харилцаа нь тухайн үйлчилгээг цааш үргэлжлүүлэх үү, үгүй юу гэдгийг шийдэж байдаг. Үргэлжилж байгаа ч гэсэн үйлчлүүлэгч таны өгч байгаа үйлчилгээнд хэр зэрэг итгэл үнэмшилтэй, оролцоотой байх вэ гэдэг нь бас чухал.
Нүдэнд харагдахгүй ч гэлээ бие биедээ өгч байгаа итгэлийг хэрхэн яаж бий болгох вэ гэдэг нь мэргэжлийн, мэргэшсэн, ёс зүйтэй харилцаанаас хамаарна. Өөрөөр хэлбэл сэтгэл зүйчийн чадвар чадамжаас ихээхэн шалтгаална гэсэн үг.
Сэтгэл зүйч бүх зүйлийг мэддэг байх албагүй. Харин мэдлэг мэдээлэлгүй байгаагаа нуух, тухайн асуудал дээр хувийн хандлагаараа буруутгах, сэтгэл хөдлөлүүдийг нь үл тоомсорлох, ичээх, түгшээх, үр дүнгүй цаг үрсэн мэт үйлчилгээг үзүүлэх нь итгэлийг алдаж байдаг.
Тиймээс сэтгэл засалч өөрөө маш үнэнч, шударга байх хэрэгтэй.
Таны мэргэшсэн чиглэлээс өөр зүйлээр зөвлөгөө авах, мэргэшсэн чиглэл мөн байлаа ч үнэт зүйлийн ялгаатай бол итгэлцэл үүсэхгүй. Тиймээс тухайн хүнд тохирсон сэтгэл зүйчийг зуучилж болох юм. Харилцаанд орж байгаа талууд хоёулаа л нээлттэй байх хэрэгтэй. Мөн үйлчлүүлэгчийн хэлж байгаа үг бүрт итгэх нь зүйтэй. Түүнчлэн биедээ хүндэтгэлтэй хандах бөгөөд хамтдаа төлөвлөгөө гаргаж ажиллах хэрэгтэй.
Аюулгүй байдлыг хэрхэн хангах вэ?
Зарим сэтгэл зүйн тулгамдсан асуудалтай хүмүүс шууд мэргэжилтэндээ итгэх нь хүндрэлтэй байдаг. Энэ тохиолдолд бид тухайн хүнд аюулгүйн мэдрэмжийг бий болгохын тулд төлөвлөгөө гаргаж, үйлчлүүлэгчдээ илүү дэмжлэгтэй хандаж, мэргэжлийн харилцааг бүрдүүлэх орчинг гаргах хэрэгтэй.
Үйлчлүүлэгч болгонд бид нэг харилцаагаар итгэлийг бий болгохгүй. Өөр өөр аргачлалаар ажиллах ёстой. Мөн одоо цаг, тухайн мөчдөө төвлөрөөд түүндээ анхаарал тавьж чадаж байна уу гэдгийг анзаарна. Тухайлбал,
1. Сэтгэл зүйч өөрийнхөө эрүүл мэнд, тогтвортой байдал, сэтгэл хөдлөлөө хэр зэрэг таньж мэдсэн бэ
2. Үйлчлүүлэгч яг одоо танаас юу хүсч байна вэ гэдгийг мэдэх
3. Үйлчлүүлэгчийн мэдрэмжийг маш сайн анхаарах хэрэгтэй.
Мөн сэтгэл зүйч нар өөрийгөө хөгжүүлж, суралцаж байх ёстой. Би чадна гээд хаалт хаачихаар харилцаа байхгүй болчихно. Улмаар сэтгэл зүйчид хатуу чанд, хаалттай байх тусам үзүүлэх үйлчилгээнд нөлөөлж эхэлдэг. Ингээд чанар, үр дүнгийн асуудал яригддаг.
Үйлчлүүлэгчид сэтгэл зүйчид найдаад ирж байгаа үед зарим зүйлийг анзаараагүй өнгөрчихвий. Эцэст нь хэлэхэд хоёр тал хоёулаа л нээлттэй байх хэрэгтэй. Мэдээж хэрэг сэтгэл зүйчийн талаас маш их чармайлт шаардана.
Тухайн асуудлыг та мэдэж байж болно. Гэхдээ таны мэдэх зүйл бүх хүнд хамааралтай, хангалттай гэсэн үг биш. Сэтгэл зүйч бол хүнд урам зориг өгч, чиглүүлдэг хүн биш юм.
Харин сэтгэл зүйч аль болох тухайн хүний онцлог, асуудалд таарсан аргачлалтай байж л сэтгэл заслын зөвлөгөө, үйлчилгээг үзүүлнэ. Тиймээс өөрсдийн мэргэжлийн чадвар, чадамжид анхаарах ёстой. Яагаад гэвэл үүний цаана хүний амьдрал, амьдралаа харах өнцөг явж байдаг.
Эх сурвалж: “Зүрхээ сонс” подкаст
