Амьдралын хэв маяг нь чихрийн шижин өвчинд нөлөөлдөг
Чихрийн шижингийн 2-р хэлбэрийн өвчтэй хүмүүсийн хувьд цусан дахь глюкоз буюу сахарын хэмжээг тогтмол шалгаж байхын ач холбогдлыг мэддэг байх. Танд эм, инсулин, амьдралын хэв маягийг зохицуулахад туслах хэрэгслүүд байх ёстой.
Гэхдээ та цусны даралт, жин, холестерин гэсэн эрүүл мэндийн өөр гурван хэмжилтийг сайтар хянах нь чухал юм.
Амьдралын хэв маяг нь зүрхний эрүүл мэндийг сайжруулах, зүрх судасны өвчлөлийг бууруулах гол хүчин зүйл юм.
Мэргэжилтнүүдийн дэмжлэгтэйгээр 7 хоногийн зүрхний эрүүл мэндийн сорилтыг 2-р хэлбэрийн чихрийн шижин өвчтэй хүмүүсийн асуудлыг шийдвэрлэхэд зориулав. Эдгээр зарчим, сонголт нь эрүүл амьдралын хэв маягийг удирдан чиглүүлэх хүсэлтэй бүх хүмүүст хамаатай юм.
Энэхүү долоон өдрийн сорилтын зорилго нь шинэ, эрүүл амьдралын хэв маягийг хэвшүүлэх явдал юм. Хуримтлагдсан нөлөө нь таны зүрхний эрүүл мэнд, зүрх судасны өвчлөл, урт наслалтад хүчтэй нөлөө үзүүлнэ.
1 дэх өдөр: Хөдлөх
ӨНӨӨДРИЙН ЗОРИЛГО: 30 минут алхана.
Чихрийн шижин өвчтэй эсэхээс үл хамааран биеийн тамирын дасгал нь эрүүл амьдралын хэв маягийн нэг үндэс юм. Хэрэв та чихрийн шижин өвчтэй бол тогтмол хөдөлгөөнтэй байх нь чихрийн шижингийн 2-р хэлбэрийг тогтворжуулж, удаашруулахад тусалдаг. Дасгал хөдөлгөөн нь цусны судас болон зүрх судасны тогтолцооны гэмтлийг удаашруулдаг.
Өдрийн турш бага багаар хөдөлгөөн хийх нь зүрхний эрүүл мэндэд ашигтай. Америкийн зүрх судасны нийгэмлэгээс долоо хоногт 5-аас доошгүй өдөр дунд зэргийн эрчимтэй 30 минут дасгал хийхийг зөвлөж байна.
Фитнессийн хэд хэдэн хүчин зүйлийг анхаарах хэрэгтэй.
Зүрхнийхээ цохилтыг сайжруулах. “Та маш удаан хурдаар явах ёсгүй” гэж доктор Басина хэлэв. Гэхдээ та амьсгаа авахалд хэцүү байвал өөрийгөө хэтэрхий их бүү шахаарай.
“Нэг алхам” зорилго тавь. Алхаа хэмжигч танд туслах болно. Тэд таны хичнээн их хөдөлж байгаа тухай ойлголтыг өгч, өдөр бүр өөртөө зорилго тавихад тань тусална. Эхлээд 5000 алхам хүрч, дараа нь 10000 хүртэл алхахыг зорь.
Бэлтгэл хийхээ бүү мартаарай. Дасгал нь зөвхөн зүрх судсанд тустай биш юм. Булчингийн дасгал нь танд илүү их эрч хүч өгч, бие махбод дахь сахарын шингээлтийг сайжруулж, зүрх, бусад эрхтнийг сайжруулдаг.
2 дахь өдөр: Жингээ хэмж
ӨНӨӨДРИЙН ЗОРИЛГО: Өөрийгөө жинлээрэй.
“Илүүдэл жин нь зүрхний өвчин тусах эрсдлийг нэмэгдүүлдэг” гэж доктор Басина хэлэв. “Илүүдэл жин нь зүрхний өвчин үүсгэх магадлалыг нэмэгдүүлдэг. Цусны даралт ихсэх, холестерин ихсэх, чихрийн шижингийн хяналт муудах зэрэгт хүргэдэг.”
Анхаарах хэдэн зүйл:
Жингээ тогтмол шалгаж байгаарай. Долоо хоногт нэг удаа жингээ шалгаж байхыг эмч нар зөвлөж байна. Болж өгвөл үүнээс ч ойр ойрхон шалгаж байгаарай.
Таны биеийн жингийн индекс (BMI). Өндөр БЖИ нь эрүүл мэндэд эрсдэл учруулж, зүрхний өвчний эрсдэлт хүчин зүйлийг улам дордуулдаг. Өөрийнхөө тухай мэдэх нь үүнийг бууруулах төлөвлөгөө гаргахад тусална.
Багахан ч гэсэн үр дүн. “3-5 хувийн жин хасах нь холестерол эсвэл триглицерид, түүнчлэн цусан дахь сахарын хэмжээг бууруулахад тусална” гэж эмч нар хэлжээ.
3 дахь өдөр: Зүрхний эрүүл мэндийн төлөөх хооллолт
ӨНӨӨДРИЙН ЗОРИЛГО: Эрүүл хооллолт.
Судлаачид чихрийн шижин өвчтэй хүмүүсийн зүрхний эрүүл мэндэд хамгийн тохиромжтой сонголт болох хоолны дэглэмийг шийдэж чадаагүй байгаа ч хязгаарлах ёстой хүнсийг хэлжээ.
Таны хязгаарлах ёстой хоол хүнс:
Ханасан өөх тос. Үүнд цагаан идээ, улаан мах, амьтны гаралтай өөх тос орно.
Хиймэл транс өөх. Жишээлбэл, маргарин, нарийн боов, шарсан хоол.
Согтууруулах ундаа. Бага хэмжээний согтууруулах ундаа зүгээр байдаг гэж доктор Басина хэлэв. Согтууруулах ундаа нь илүүдэл илчлэг агуулдаг бөгөөд нийт илчлэгийн хэмжээг нэмэгдүүлэхэд хувь нэмэр оруулдаг.
Таны идвэл зохих хоол хүнс:
Өөх тос багатай, эслэг ихтэй хоол хүнс. Үүнд үр тариа, хүнсний ногоо, навчит ногоон орно.
Жимс, хүнсний ногоо. “Жимс нь элсэн чихэр ихтэй байдаг” гэхдээ та өдөрт хэд хэдэн порц л идэж болно.
Загас. Долоо хоногт хоёр удаа идэхийг зорь. Таны хамгийн сайн сонголт бол хулд загас, туна загас юм.
Ханаагүй өөх тос. Жишээлбэл, авокадо, чидун жимсний тос, самар, үр, загасны тос зэрэг орно.
4 дэх өдөр: Тамхины зуршлыг хая
ӨНӨӨДРИЙН ЗОРИЛГО: Хэрэв та тамхи татдаг бол тамхинаас гарах төлөвлөгөө гарга.
“Тамхинаас гарах нь зүрхний шигдээс, цус харвалт, мэдрэлийн өвчин, бөөрний өвчин, нүдний өвчин зэрэг эрсдлийг бууруулдаг” хэмээн доктор Басина хэлэв.
Баар, ресторан, олон нийтийн газрын дам тахидалт нь хүртэл зүрхний өвчин тусах эрсдлийг нэмэгдүүлдэг.
Тамхинаас гарахад туслах чухал зөвлөмжүүд:
Туслах. Тамхинаас гарахад тань тус болох эмийн эмчилгээ, түүний дотор эмчтэй ярилц.
Энэ нь үргэлж хялбар байдаггүй. “Ихэнх хүмүүсийн хувьд тамхинаас гарах нь үнэхээр хэцүү байдаг”. Гэхдээ энэ нь та хичээх хэрэггүй гэсэн үг биш юм. Таны хийж чадах хамгийн сайн зүйл бол төлөвлөгөө гаргаж, урам зориг өгөх, дэмжих системийг хөгжүүлэх явдал юм.
Дахин оролдоод үзээрэй. Өвчнийг хянах, урьдчилан сэргийлэх төвөөс насанд хүрсэн тамхичдын 68 хувь нь тамхинаас гарах хүсэлтэй байгаагаа мэдэгджээ. /АНУ/ Хагасаас илүү хувь нь ядаж нэг удаа тамхинаас гарахыг оролдсон байна.
5 дахь өдөр: Стрессийг ашигтай аргаар даван туулах
ӨНӨӨДРИЙН ЗОРИЛГО: Таныг тайвшруулах үйл ажиллагааг хайж олоод хий.
“Биднийг бухимдсан үед судас дарангуйлдаг стрессийн даавар үүсдэг тул төгс хяналтанд ороогүй, гипертензийн өвчтэй хүмүүсийн хувьд энэ нь цусны даралтыг аюултай түвшинд хүртэл нэмэгдүүлдэг” гэж эмч нар хэлжээ.
Стресс нь зөвхөн цусан дахь сахар, цусны даралтыг нэмэгдүүлэхээс гадна үрэвслийг нэмэгдүүлж, зүрхний шигдээс, тархинд цус харвах магадлалыг нэмэгдүүлдэг.
Стрессээ бууруулахын тулд та хэт их идэх, тамхи татах, архи уух эсвэл бусдад уурлах зэрэг авир магадгүй юм. Гэхдээ эдгээр нь таны бие махбодын болон сэтгэцийн эрүүл мэндийг хадгалах эрүүл зам биш юм.
Үүний оронд стресс бууруулах зарим арга хэмжээг аваарай.
- Дасгал хийх
- Цэцэрлэгжүүлэлт
- Гүнзгий амьсгалах
- Йог хийх
- Зугаалах
- Бясалгал
- Дуртай хөгжмөө сонсох
- Танд таалагдах төсөл дээр ажиллах
- Цэвэрлэгээ хийх
- Тэмдэглэл
- Хобби
6 дахь өдөр: Унтах цагийг нэн тэргүүнд тавь
ӨНӨӨДРИЙН ЗОРИЛГО: Орой эрт унтаж байгаарай.
Хэрэв та маш олон ажил хийдэг бол энэ нь ойлгомжгүй санагдаж магадгүй юм. Гэхдээ энэ нь зүрхний эрүүл мэндийг сайжруулах хамгийн сайн арга.
Хэрэв хүн шөнө сайн унтахгүй бол даралт, цусан дахь сахарын хэмжээг нэмэгдэх хандлагатай байдаг.
Нойрыг сайжруулах хэдэн аргыг энд оруулав.
Хуваарь гаргах. Таны болон гэр бүлийн хэрэгцээнд хамгийн сайн тохирсон төлөвлөгөө гаргаж, 7-9 цаг унтах боломжийг олго. Амралтын өдрүүдэд ч, аялахдаа ч аль болох унтаж байгаарай.
Өдөр тутмын хэв маягийг бий болгох. Унтахынхаа өмнө салхинд гарж, дасгал хийхийг зөвлөж байна. Унтахаасаа өмнө хэдэн хуудас ном уншиж эсвэл зугаал. Хамгийн гол нь миний унтах цаг болсон гэх мэдрэмжийг бие махбодид мэдрүүлэх нь чухал юм.
Эмчтэйгээ уулзах хэрэгтэй. Хэрэв та унтсан ч гэсэн нозоороод байгаа бол эмчид үзүүлээрэй. Таны нойрны чанарт сөргөөр нөлөөлж болзошгүй эрүүл мэндийн шалтгаан байж магадгүй.
7 дахь өдөр: Эрүүл мэндээ хянах
ӨНӨӨДРИЙН ЗОРИЛГО: Эрүүл мэндийн өдрийн тэмдэглэл бичиж эхэл.
Та цусан дахь глюкозын тоог өдөр бүр эсвэл хэд хэдэн удаа хянах боломжтой. Энэ бол таны анхаарал халамжийн чухал хэсэг юм. Гэхдээ одоо зүрхний эрүүл мэндийн талаарх гурван зүйлийг дагаж эхлэх нь зүйтэй болов уу: цусны даралт, гемоглобины A1c, холестерины хэмжээ.
Үүнийг хийхийн тулд эмчээсээ асуугаарай. Эдгээр түвшинг гэртээ хэмжих арга замын талаар тэдэнтэй ярилц. Гэртэй заавал даралтны аппараттай болоорой.
Таны эрүүл мэндийн өдрийн тэмдэглэлдээ өдөр бүр ямар мэдрэмж төрдөг, ямар дасгал хийсэн, цусны даралт хэд байсн, ямар хоол идсэн тухайгаа бичээрэй. Энэ нь өөртөө зорилго тавьж, цаг хугацаа өнгөрөхөд хичнээн их сайжруулалт хийснийг харуулах болно.
Эх сурвалж: healthline
