Хадгаламж нь таны зорилго, мөрөөдөлтэй холбогдвол илүү үр дүнтэй болно. Мөрөөдөл, зорилгодоо хүрэхийн тулд хуримтлалын төлөвлөгөөгөө гаргаж түүнд тууштай, санхүүгийн сахилга баттай байх нь чухал.
- Төлөвлөгөө гарга
Хуримтлал хийх зорилгоо ач холбогдлоор нь жагсаан бичээрэй. Хуримтлалын хэмжээ,цаг хугацаа, зорилгоосоо хамаарч өөр өөр байна. Тиймээс нягт, нямбай төлөвлөгөө гаргаж сурах хэрэгтэй.
- Цаг хугацааг тодорхойлох
Богино хугацааны зорилго тодорхойлоход амархан. Хэрэв та байшин худалдаж авахыг хүсэж байгаа бол хэдий хэмжээний урьдчилгаа төлбөр шаардлагатайг мэдэх хэрэгтэй. Хэрэв өөр зүйлд зарцуулах гэж байгаа бол тэр мөнгийг цуглуулахад хэдийн хэмжээний хугацаа шаардлагатайг тооцоолоорой. Ингэснээр та ямар хэмжээний хадгаламж үүсгэхээ шийдэж чадна.
- Зардлаа хэмнэх
100 хувь бүх зардлаа танах хэрэгтэй гэж хэлэх гэсэнгүй. Сар бүрийн бодит орлого, зардлуудаа бүртгэн, шинжилж үзэх нь хаана хэмнэлтийн бодит боломжууд буйг олж харахад танд тусална. Нэг, хоёр сар бүртгэсний дараа зарцуулалтаа нарийвчлан харж судал. Сарын эцэст зардал тус бүрийг нягтлаад илүү, ашиггүй зардлаа танаж, хэмнэх боломжтой хэмжээгээ тодорхойлно.
- Хуримтлуулж чадах хэмжээгээ тодорхойлох
Мэргэжилтнүүд орлогынхоо 10-15 хувийг хуримтлуулахыг зөвлөдөг тул өөртөө дарамт болохгүй хэмжээгээр хуримтлал үүсгэх хэрэгтэй. Та цалингийн данснаасаа хадгаламжийн данс руугаа шууд шилжүүлэх банкны үйлчилгээ авснаар хуримтлал хийхэд илүү хялбар, үр дүнтэй байж болох юм.
- Хуримтлалаа эхлүүлж, хэрхэн өсч байгааг хянаж байх
Нэгэнт хуримтлал хийхээр шийдсэн бол цалин, орлогоосоо тодорхой хэсгийг хадгаламжийн данс руугаа тодорхой өдрүүдэд тогтмол шилжүүлж хэвших хэрэгтэй. Түүнийгээ сар бүр бүртгэж, тэмдэглэж хянаж яваарай.
